Bota e futbollit ka nisur të marrë ndryshime të një pas njëshme që nga VAR-i dhe deri tek shtimi i numrit të skuadrave në Kupën e Botës.
Kësaj here ndryshimet do të vijnë në kohëzgjatjen e një ndeshjeje. Siç njofton “Marca”, IFAB, organizmi i cili vendos dhe përditëson rregullat e futbollit, do të mblidhet këtë fundjavë në Londër për të shqyrtuar idetë e reja që ka dërguar një komision i krijuar nga FIFA dhe ku ajo e kohës efektive të lojës, do të jetë një temë shumë e rëndësishme.
Risia kryesore që do të diskutohet do të jetë koha e humbur gjatë festës së golit, e cila do të rikuperohet në shtesë. Nëse një lojtar feston pas një goli për disa minuta, gjyqtari do t’i shtojë ato minuta të humbura të festës gjatë kohës shtesë.
Gjithashtu, nëse shënohet gol dhe një lojtar i stolit do jetë në fushë, goli do anulohet. Veç këtyre, edhe lëvizja e portierit dhe shpërqendrimi i kundërshtarit gjatë goditjes së penalltive do rishikohet.
Nëse diçka e tillë ndodh, rrjedhimisht do ketë më shumë minuta shtesë në fundin e ndeshjes, çka do ngarkonte futbollistët.
