Kryeministri i Kosovës, Albin Kurti ka treguar detaje të reja nga takimi i zhvilluar në Ohër me presidentin e Serbisë, Aleksandar Vuçiç.
Sipas deklaratës së Kurtit ai ka bërë edhe ofertë për të hartuar ai një statut, por që pala tjetër kërcënoi me përfundim të takimit.
“Unë kam bërë oferta vazhdimisht kam qenë më kreativi, e fundit ishte në pasditen e hershme të 18 marsit, dhe në momentin kur unë bëra ofertë, pala tjetër kërcënoi në një far mënyre me përfundim të takimit. Qartazi kam thënë për statutin se si duhet të rregullohet kjo çështje, unë kam kërkuar prej palës tjetër serbe, që të jenë dakord me tri shtylla, brenda të cilës unë do ta draftoja atë statut se si rregullohet kjo gjë,” deklaroi Kurti.
“Me datën 18 mars kam thënë nëse ju jeni dakord me Kushtetutën e Republikës së Kosovës, edhe me aktgjykimin e Gjykatës Kushtetuese, të cilat i ngërthejnë vlerat evropiane, demokratike, universale, në njërën anë, me qëndrimin evropian, edhe kam shkuar më hollësisht kam treguar se cili është ai, dhe me qëndrimin amerikan. Pra tri shtylla: Republika e Kosovës me Kushtetutë dhe vlera, qëndrimi evropian, që është konkret, qëndrimi amerikan, që po ashtu është konkret, në këtë tre-shtyllash parimor e të drejtë, unë nesër kam thënë që nesër ua sjell juve draftin e statutit, e quajmë qysh të duash,” shtoi Kurti.
