Kryetari i komanduar i PD-së, Enkelejd Alibeaj dënon sulmin kundër “Top Channel” dhe vrasjen e rojës së godinës së televizionit kombëtar. Ai kërkon zbardhjen e kësaj ngjarje dhe vendosjen e autorëve përpara drejtësisë.
“Sulmi me armë ndaj televizionit kombëtar, Top Channel dhe vrasja e rojës së sigurisë është një ngjarje e rëndë dhe akt kriminal të cilin e dënoj me forcë.
Ngushëllimet e mia për familjen e punonjësit të sigurisë Pal Kola, që humbi jetën në këtë ngjarje të rëndë. Sulmi i mbrëmshëm është një sulm ndaj medias, fjalës së lirë, por është dhe një sulm i rëndë ndaj sigurisë publike në vend.
Në emër të PD bëj thirrje organeve ligjzbatuese të zbardhin urgjentisht ngjarjen dhe autorët të vihen para drejtësisë. Mbështetje dhe solidaritet për stafin e Top Channel” shkruan ai.
