Deputeti i Partisë Demokratike, Dashnor Sula, duke folur në seancën e sotme plenare u shpreh se Parlamenti duhet të vijojë punimet dhe jo të ndërpritet për shkak të zgjedhjeve.
“Mirë mo përpara një viti pse e vutë këtë taksë të hirës ju? Ju nuk lini gjë pa rënë në tokë, edhe ujin, edhe frymën e taksoni. Tani doni ta hiqni këtë taksë. Po mor po nuk jemi kundër, por që të shqetësoheni kaq shumë për këtë taksë, pse nuk hiqni taksën e karburantit ju?
A e dini ju që FMN e radhit Shqipërinë si vendi më i varfër deri në 2028, në gjithë rajonin, lëmë pas vetëm Kosovën. Më gjeni një raport në organizmat ndërkombëtarë ku jemi mirë.
Rreni, mashtroni, joshni gjatë fushatave zgjedhore. Ju nuk e keni bërë një gjë të tillë më parë. Parlamenti sot e deri në 14 maj s’ka për të pasur. Të bëhet parlament çdo javë, të mos ndërpritet se ju e keni mendjen te zgjedhjet.
Ju tërheq vëmendjen që të mos mbyllet parlamenti dhe të vazhdojë siç i takon. Sepse me rregullore nuk i lejohet ti ndërpresë punimet.”, u shpreh ndër të tjera deputeti Sula.