Dy persona janë vrarë pasi një person hapi zjarr në aeroportin ndërkombëtar të Kishinauit në Moldavi. Presidentja Maia Sandu tha se dy të vdekurit ishin një roje kufitare dhe një zyrtar i sigurisë së aeroportit, ndërsa një person i tretë u plagos.
Policia deklaroi se autori i armatosur është plagosur dhe është arrestuar. Zyrtarët thanë se të shtënat kishin ndodhur pasi një shtetasi të huaj iu mohua hyrja në vend. Kryeministri moldav Dorin Recean deklaroi se i dyshuari ishte një shtetas 43-vjeçar nga Taxhikistani.
Ai kishte mbërritur nga Turqia dhe më pas iu refuzua hyrja, thanë autoritetet vendase. Ndërsa po dërgohej në një zonë të posaçme në aeroport, ai i kapi një armë një oficeri të policisë kufitare dhe vrau dy persona.
Videot nga vendi i ngjarjes treguan pasagjerët jashtë aeroportit në bar, ndërsa ndërtesa ishte evakuuar. Fluturimet brenda dhe jashtë aeroportit të Kishinaut, i cili është më i madhi në vend, janë ndalur.
Moldavia ka qenë në gatishmëri prej muajsh pasi presidenti Sandu akuzoi Rusinë për komplot për të përdorur “diversantë” të huaj për të rrëzuar qeverinë e saj pro-Bashkimit Evropian.
Paralajmërimi i saj në shkurt erdhi pasi 12 tifozëve serbë të futbollit iu ndalua hyrja në vend përmes aeroportit të Kishinauit. Një grup boksierësh nga Mali i Zi gjithashtu u ndaluan në aeroport dhe u kthyen në shtëpi.
Kremlini mohoi akuzat për një komplot, për të cilin Presidenti i Ukrainës Volodymyr Zelensky tha se ishte përgjuar nga Kievi. Moldavia ka një popullsi prej 2.6 milionë banorësh dhe u bë një kandidat për anëtarësim në BE verën e kaluar.
