“Tani bëhej fjalë për shpëtimin e ekonomisë së tretë më të madhe në eurozonë, Italisë. Normat e interesit që Roma duhej të paguante për të rifinancuar borxhin e saj kolosal kishin thyer një rekord të ri, në 6.4%. Ne kishim arritur kufirin e qëndrueshmërisë së borxhit italian”!
Kështu shprehet Nicolas Sarkozy, i cili ka botuar një pjesë të re të kujtimeve të tij, “Koha e betejave”, ku del e gjithë drama e momenteve të përjetuara nga liderët europianë në Samiti i Kanës në nëntor 2011, por edhe pranimi i qartë se ai dhe kancelarja Angela Merkel ishin vendimtare për shkarkimin e Silvio Berlusconit.
“Ndërsa koha kalonte dhe vështirësitë rriteshin, situata u përkeqësua”-pranon sot Sarkozy për herë të parë qartë në librin e tij. Megjithatë, duke i dhënë nderime Berlusconit: “Edhe pse marrëdhëniet tona ishin përkeqësuar” – shkruan ai – “u pikëllova sinqerisht nga vdekja e tij. Ai do të lërë kujtimin e një sipërmarrësi të madh, një politikani vërtet të talentuar dhe dashamirës, që e donte jetën përtej çdo gjëje”.
Në atë nëntor dramatik, në Kanë, ishin dy liderët e Parisit dhe të Berlinit ata që “thirrën” Berluskonin. “Ai filloi të na shpjegonte” – tregon Sarkozy – “se ishim ne që nuk e kuptonim se borxhi italian ishte në duar të italianëve dhe se me tregjet ndërkombëtare nuk kishte asnjë rrezik. Ai hodhi hipotezën e një huaje të madhe kombëtare për të pyetur italianët, ishte mjaft delirant. E gjitha kjo ishte e kalitur me batutat që na kishte mësuar dhe që ishin akoma më të pa vend se zakonisht. Shikuam të tmerruar fillimin e fundit të një karriere të madhe politike” shkruan ai.
Më pas, Franca dhe Gjermania ia komunikuan vendimin. “Ishte një moment tensioni i madh, më duhej t’i shpjegoja se ai ishte problemi me Italinë! Unë dhe Angela ishim të bindur se ishte bërë ‘primi i rrezikut’ që vendi duhej t’u paguante kreditorëve. Sinqerisht menduam se situata do të kishte qenë më pak dramatike pa të dhe qëndrimin e tij patetik. Ai nuk e dinte se deri në fund të muajit do të braktisej dhe do të detyrohej të largohej nga detyra” shkruan ai./ ANSA
