Opozita ndodhet në Kuvend dhe vijon që të komunikojë me qytetarët përmes Facebook-ut me dritat e sallës fikur, pasi seanca u mbyll nga drejtuesja, Ermonela Felaj. Fikja e dritave solli irritimin e fortë të deputetëve të opozitës. Flamur Noka, sipas gazetarëve që ndodheshin në sallë është shprehur se nëse mazhoranca nuk do “të digjet salla”, duhet të rikthejë ndriçimin në sallën e Parlamentit. Deputetët e opozitës kanë mbetur në errësirë pas fikjes së dritave. Ish-kryeministri Berisha përmes komunikimit në rrjetet sociale ka bërë të mundur transmetimin e pamjeve nga brenda sallës. Ai tha se beteja e opozitës nis sot kundër qeverisë Rama.
“Kjo është dita e parë e betejës sonë, në këtë betejë e kemi detyrim ndaj jush. Ju, me kurajën votuat kundër qeverisë. Kundër një qeverie e cila ka rekordet më të zeza në vjedhjen, varfërimin dhe mjerimin e shqiptarëve. Ka rekordet më të zeza në lidhje me krimin dhe drogën. Ka rekordet më të zeza në pasurimin e kryeministrit, ministrave dhe familjarëve të tyre me pasuritë publike dhe fondet e buxhetit të shtetit” tha ai.
