Kryetari i grupit të PD-së, Gazment Bardhi, Flamur Noka, Bledion Nallbati dhe Flamur Hoxha janë katër deputetët demokratë që janë përjashtuar me nga 10 ditë nga punimet e Kuvendit për shkak të ngjarjeve të së hënës ku ndezën flakadanë duke krijuar edhe një vatër zjarri brenda sallës plenare.
Në relacionin me kërkesën që i depozitoi Komisionit të Etikës, PS argumentonte se Bardhi goditi me karrige në dorë një gardist, Nallbati nxori tymueset nga çanta e njërës prej deputeteve demokrate, e ndezi dhe ë pas ia dha Flamur Hoxhës që e la në vendin ku ulet Lulzim Basha.
Njërën nga tymueset e mori në duar Flamur Noka duke e lëshuar drejt kryeministrit Edi Rama. Për të gjithë këto, Komisioni i Etikës me shumicë socialiste vendosi t’i përjashtonte 10 ditë. Nga masa disiplinore shpëtuan Albana Vokshi dhe Sorina Koti.
