Gjykata e Posaçme refuzoi sot kërkesën e Fredi Belerit që të betohet në krye të bashkisë Himarë. Jashtë debate në sallë dhe jashtë protestë. “Jeni të shitur”! Ishin disa nga akuzat drejt qeverisë dhe kryeministrit Edi Rama nga protestuesit. Por kjo nuk bëri që gjykata të tërhiqej.
Por si e shikon avokati Sokol Hazizaj këtë proces? I ftuar në emisionin “5Pyetjet nga Babaramo” ai tha se për 7 muaj që nga momenti i arrestimit, gjyqi duhet të kishte përfunduar.
“Gjykata e Shkallës së Parë duhet ta kishte mbaruar gjykimin e kësaj çështje. Nuk ka pasur shumë për të hetuar. Janë gjetur dhe identifikuar personat, përgjimet, celularët, bisedat për paratë në këmbim të votës. Vonesa që ka shkaktuar prokuroria e posaçme më duket se është e pajustifikuar” tha ai.
Por a ka të drejtë drejtoria e burgjeve që t’i japë leje që të betohet? “Burgjet nuk kanë fare punë në këtë mes. Ky është tagri i prokurorit dhe gjyqtarit” tha konstitucionalisti.
Për betimin, avokati tha se Beleri mund të ishte lejuar përpara se të merrej i pandehur, pra deri në momentin që ishte i dyshuar. “Ka pasur kohë të mjaftueshme kur ka qenë i dyshuar, të kryente betimin, sepse ka qenë në cilësinë e të dyshuarit.
Në momentin që i është njoftuar akuza është i pandehur. Sot nuk ka kah ligjorë, por kërkesa që ka bërë përpara njoftimit të akuzës ka pasur kah ligjor”.
Po nëse ka qenë përsëritës? “Atëherë është gabimi i atyre që e kanë çuar kandidat” tha avokati.
