“Wall Street Journal” raporton se urdhri për të eliminuar Prigozhin-in më 23 gusht u dha nga sekretari i Këshillit të Sigurisë Kombëtare të Rusisë, njeriu i afërt me Putinin, Nikolai Patrushev.
Duke cituar burime nga inteligjenca perëndimore dhe nga një ish-oficer i sigurisë në Rusi, WSJ raporton se Patrushev e konsideronte Prigozhin si kërcënim për regjimin e Putinit shumë kohë përpara se ai të “rebelohej” në qershor.
Sipas raportimeve, Patrushev nuk i aprovonte kritikat e hapura të shefit të Wagner për mënyrën sesi po trajtohej lufta në Ukrainë. Ai druhej se grupi mercenar ishte bërë shumë i fuqishëm dhe mund të dilte jashtë kontrollit të Kremlinit.
Patrushev ka qenë një nga njerëzit më të afërt me Putinin që nga momenti i parë që ka marrë detyrën. Fuqia e tij është shtuar në atë pika sa i konsiderohet, si njeriu i dytë më i fuqishëm në Rusi.
72-vjeçari ka nisur të punojë me Putinin në vitet 1970 kur shërbyen bashkë në KGB në Leningrad, Shën Petersburg i sotëm. Para se të bëhej sekretar i Këshillit të Sigurisë Kombëtare të Rusisë, ai ishte kreu i FSB-së famëkeqe.
Pasi shtypjes së rebelimit dhe transferimit të Prigozhin në Bjellorusi, burimet e cituara nga gazeta amerikane thonë se Patrushev ishte i vendosur të ndëshkonte themeluesin e Wagner. Putin nuk shprehu asnjë kundërshtim për planin.
Sipas presidentit rus, aeroplani me të cilin po udhëtonte shefi i Wagner më 23 gusht u rrëzua nga keqpërdorimi i granatave prej pasagjerëve në bord.
Por, WSJ raporton se pretendimi i Putinit nuk është i vërtetë, ndërsa burimet e gazetës pretendojnë se shpërthimi që shkaktoi rrëzimin u shkaktua nga një bombë në shkallë të vogël e vendosur nën krahun e avionit të Prigozhin, teksa ai ndodhej në aeroport në Moskë.
