Gjatë orëve të vona të natës një anëtar i mafias greke është ekzekutuar në Zonën e Neos Kosmos.
Plot 81 plumba janë qëlluar drejt 44-vjeçarit, B.Z., në atë që për autoritetet vendase është një larje e vjetër hesapesh.
Pak pas orës 02:00, autorët i janë afruar makinës së 44-vjeçarit, e cila ishte e parkuar përballë karburantit në pronësi të tij, në kryqëzimin e rrugëve Frantzis dhe Ilias Ilios dhe e kanë qëlluar me kallashnikov.
44-vjeçari ra i vdekur në vend, ndërsa xhipi i tij i zi u “bë shoshë” nga plumbat.
Sipas informacioneve, në automjetin e përdorur nga autorët kanë qenë të paktën tre persona, ndërsa në vendin e ekzekutimit policia ka gjetur 81 gëzhoja.
Viktima ishte i njohur për autoritetet, pasi në vitin 2018 kishte qenë shënjestër e një sulmi të armatosur pranë portit të Pireut, ku shpëtoi edhe falë ndërhyrjes së policisë.
Automjeti i përdorur nga autorët është gjetur i djegur, në përpjekje për të humbur gjurmët.
