Dhuna me pasojë vdekjen e Lulzim Fejzullahut 18-vjeç në Podujevë pak ditë më parë i ka tronditur të gjithë në Kosovë. Dy të mitur janë arrestuar për ngjarjen e rëndë.
Shkak dyshohet se ishte sherri i nisur për radhën në berberhane që më pas solli hakmarrjen e dy të miturve që e përplasën me makinë, zbritën dhe e qëlluan me shufra hekuri.
Por ku janë hetimet për këtë rast? “5Pyetjet.al” zhvilloi një bisedë me ekspertin e sigurisë në Prishtinë, Bedri Elezi, i cili u shpreh se frika është e madhe që nuk do të ketë drejtësi për Lulin, i cili ishte jetim.
Ai tha se policia e Kosovës me mënyrën si e trajtoi ngjarjen e vrau për herë të dytë 18-vjeçarin, që sipas tij rrethi i afërt e tregonte si djalë të qetë dhe trim.
Elezi tha më tej se nëse nuk do të ishin kamerat e sigurisë, që e zbuluan dhe mbështetja e medias, ngjarja nuk do të ishte zbardhur. Më poshtë intervista e plotë me ekspertin e njohur të sigurisë Bedri Elezi.
