Policia e Durrësit ka vënë në pranga një 49-vjeçar, që kishte municion luftarak.
Gjatë operacionit, u sekuestruan 773 fishekë dhe celulari i atë arrestuarit.
Njoftimi i policisë:
Durrës
Posedonte municion luftarak, pa leje, dhe vinte baste sportive, me celular, arrestohet 49-vjeçari.
Sekuestrohen 773 fishekë luftarak dhe celulari i të arrestuarit.
Nga kontrollet në kuadër të megaoperacionit “Sundimi i ligjit”, të kryera me mbështetjen e inteligjencës policore, me qëllim goditjen e paligjshmërive, në çdo formë të shfaqjes së tyre, shërbimet e Komisariatit të Policisë Durrës konstatuan se shtetasi Y. A. posedonte në ambientet e banesës së tij, në lagjen nr. 10, qindra fishekë luftarak, pa leje.
Gjithashtu, nga verifikimet u konstatua se ky shtetas kishte në celular, faqe online aktive, të cilat i përdorte për të vënë baste sportive.
Në përfundim të veprimeve procedurale, u vu në pranga shtetasi Y. A., 49 vjeç, si dhe u sekuestruan në cilësinë e provës materiale, 773 fishekë luftarak dhe celulari i 49-vjeçarit.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.
