Sekretari amerikan i Shtetit Antony Blinken tha të shtunën se ekziston “një mundësi e jashtëzakonshme” në muajt e ardhshëm që Izraeli të normalizojë lidhjet me fqinjët arabë dhe theksoi gjithashtu nevojën për krijimin e një shteti palestinez.
Diplomati i lartë amerikan tha se po bëhen përpjekje reale nga vendet arabe për të rigjallëruar Autoritetin Palestinez, në mënyrë që të bëhet më efektiv në përfaqësimin e palestinezëve.
“Pothuajse çdo vend arab tani dëshiron të integrojë Izraelin në rajon për të normalizuar marrëdhëniet…për të ofruar angazhime dhe garanci në mënyrë që Izraeli të ndjehet më i sigurt,” tha zoti Blinken në Konferencën vjetore të Sigurisë në Mynih.
“Dhe gjithashtu, mendoj se është më urgjente se kurrë që të vazhdojmë përpekjet drejt një shteti palestinez që garanton gjithashtu e Izraelit,” shtoi ai.
Administrata e presidentit Biden është angazhuar për të siguruar një marrëveshje për normalizimin e lidhjeve midis Arabisë Saudite dhe Izraelit.
Arabia Saudite dhe vendet e tjera arabe kërkojnë krijimin e një shteti palestinez si pjesë të marrëveshjes. Uashingtoni po punon gjithashtu për të arritur një marrëveshje për të siguruar lirimin e pengjeve izraelitë të rrëmbyer nga Hamasi më 7 tetor.
Marrëveshja për pengjet dhe një pauzë humanitare shihen si thelbësore për të ndihmuar në avancimin e bisedimeve për një marrëveshje normalizimi midis Arabisë Saudite dhe Izraelit./VOA
