Bayern Munich dhe PSG janë dy ekipet që kanë prerë biletat e para për në fazën çerekfinale të Champions League këtë sezon. Bavarezët nuk lanë vend për surpriza këtë herë përballë Lazios, duke triumfuar pastër me shifrat 3-0, e duke hedhur prapa krahëve fitoren 1-0 të italianëve.
Pjesa e parë pa Bayernin menjëherë në avantazhin e dy golave, Kane dhe Muller shënuan për përmbysjen gjjermane, e në të dytën ishte sërish Harry Kane me të gjashtin gol këtë sezon në UCL që vendosi përfundimisht kualifikimin. Përfundon këtu aventura e të besuarve të Sarrit, të cilët nuk mundën të realizonin asnjë goditje në portë në harkun e 90 minutave, hera e parë që nga viti i largët 2005.
Nga ana tjetër, as PSG nuk ka gabuar përballë Real Sociedad në Spanjë. Francezët fituan me rezultatin 1-2, ndërsa ai i përgjithshmi ishte 4-1. Mbappe ishte autori i dy golave, ku të parin e shënoi në minutën e 15’, ndërsa të dytin në minutën e 56’. Francezët janë çerekfinalistët e dytë në Champions League.
