Vrasja e boksierit shqiptar Besar Nimani vazhdon të hetohet në Gjermani, ku së fundmi në duart e hetuesve ka mbërritur një letër e cila thuhet se i përket njërit prej vrasësve.
Sipas Westfalen-Blatt, në letër raportohet se 33-vjeçari Ayman Krit pranon vrasjen e 38-vjeçarit. Grupi hetimor që po punon për të zbardhur vrasjen e ish-boksierit nga Kosova, e disponon këtë letër në email. Në të, personi në fjalë deklaron se ai ishte që e qëlloi për vdekje Nimanin, nga frika.
Ai gjithashtu pretendon se në të kaluarën është rrahur 3 herë nga boksieri dhe ky i fundit e ka kërcënuar me jetë. Një pretendim i cili është konsideruar absurd nga ana e vëllait të viktimës.
Në lidhje me ngjarjen deri më tani nga hetuesi janë shpallur në kërkim 2 persona, Ayman Dawoud Kirit dhe Hüseyin Akkurt, të dy 33 vjeç.
Më herët vëllai i boksierit ka deklaruar se para disa vitesh Besari ishte konfliktuar me një grup kurdësh dhe këta të fundit u hakmorrën duke i marrë jetën.
Besar Nimani u qëllua për vdekje pasditen e 9 marsit në qytetin e Bielefeld, ku jetonte prej vitesh. Ai ishte baba i 3 fëmijëve.
