Ndërmjetësuesi i Bashkimit Evropian për dialogun Kosovë-Serbi, Miroslav Lajçak deklaroi se do t’i presë palët në një takim të ardhshëm për çështjen e dinarit, duke njoftuar se në takimin e së enjtes palëve iu dha hapësirë e mjaftueshme.
Sipas Lajçakut, takimi u mbyll me një propozim për kompromis në këtë çështje, si përpjekje për t’i kapërcyer dallimet. “Do të presë takimin e radhës pas marrjes së komenteve konstruktive”, ka shkruar ai në rrjetin social X.
Kryenegociatori i Kosovës, Besnik Bislimi, ka deklaruar pas takimit në Bruksel me homologun serb, Petar Petkoviç se Serbia kishte “qëndrime shqetësuese” për çështjen e transferimit të mjeteve financiare në valutën dinar nga Serbia në Kosovë.
Ai ka deklaruar për KTV-në në Bruksel se takimi i sotëm ishte më i konkretizuar, e ndërmjetësuesi evropian, Miroslav Lajçak, dha një propozim të ri.
Petkoviç ka thënë se bisedimet e të enjtes ishin të vështira dhe të tensionuara. Ai tha se pati bisedime direkte me palën kosovare.
Në anën tjetër, korrespondenti i KOHËS në Bruksel, Augustin Palokaj, ka thënë se takimi pati dilema të mëdha e “mund të quhet kthim prapa”.
