Qindra shkencëtarë kryesorë të klimës në botë, parashikojnë që temperaturat globale të rriten në të paktën 2.5C mbi nivelet paraindustriale këtë shekull, duke shkatërruar objektivat e kaluara të dakorduara ndërkombëtarisht dhe duke shkaktuar pasoja katastrofike për njerëzimin dhe planetin, ka zbuluar një sondazh ekskluziv i The Guardian.
Pothuajse 80% e të anketuarve, të gjithë nga Paneli autoritar Ndërqeveritar për Ndryshimet Klimatike (IPCC), parashikojnë të paktën 2.5C ngrohje globale, ndërsa pothuajse gjysma parashikojnë të paktën 3C (5.4F). Vetëm 6% menduan se do të përmbushej kufiri i rënë dakord ndërkombëtarisht 1.5C (2.7F).
Shumë nga shkencëtarët parashikojnë një të ardhme “gjysmë-distopike”, me zi buke, konflikte dhe migrim masiv, të nxitur nga valët e të nxehtit, zjarret, përmbytjet dhe stuhitë me një intensitet dhe frekuencë shumë më të madhe se ato që kanë goditur tashmë.
Ekspertë të shumtë thanë se kishin mbetur të pashpresë, të indinjuar dhe të frikësuar nga dështimi i qeverive për të vepruar pavarësisht provave të qarta shkencore të ofruara.
“Unë mendoj se ne jemi duke shkuar drejt përçarjes së madhe shoqërore brenda pesë viteve të ardhshme,” tha Gretta Pecl, në Universitetin e Tasmanisë. “Autoritetet do të mbingarkohen nga ngjarje ekstreme, prodhimi i ushqimit do të ndërpritet. Nuk mund të ndjeja një dëshpërim më të madh për të ardhmen.”
Peter Cox, në Universitetin e Exeter, MB, tha: “Ndryshimi i klimës nuk do të bëhet papritur i rrezikshëm në 1.5C, tashmë është. Dhe nuk do të përfundojë ‘loja’ nëse kalojmë 2C, gjë që mund ta bëjmë fare mirë.”
