Bayer Leverkusen u rikthye nga dëshpërimi i disfatës në finalen e Ligës së Eurpës, duke mbyllur sezonin ashtu siç meritohej, me një triumf në Kupën e Gjermanisë.
“Aspirinat” mundën 0-1 Kaiserslautern, në Olympiastadion (Berlin). Në minutën e 30-të, Xhaka “shkundi merimangat” e portës së kundërshtarit me një goditje fantastike nga distanca. Ekipi i Xabi Alonsos komplikoi llogaritë pas daljes me karton të kuq të Odilon Kossounou në minutën e 44-të.
Pavarësisht inferioritetit numerik, Leverkusen dominoi edhe në pjesën e dytë, por pa mundur dot të gjejë golin e dytë. Gjithsesi, pak rëndësi ka, Xhaka me shokë fitojnë këtë trofe, një nga më të rëndësishmit në Gjermani.
