Donald Trump ka deklaruar se Tajvani duhet t’i ofrojë një kompensim SHBA-së për mbrojtjen nga kërcënimi kinez, duke vënë në dyshim mbështetje të ardhshme të Uashingtonit për ishullin në rast se ai rikthehet në Shtëpinë e Bardhë pas zgjedhjeve të nëntorit.
Kryeministri tajvanez, Cho Jung-tai, ka theksuar se marrëdhëniet mes Tajvanit dhe SHBA-së janë të forta, pavarësisht mungesës së lidhjeve formale, duke shtuar se Tajvani po forcon gjithashtu kapacitetet e tij mbrojtëse.
Në një intervistë me Bloomberg Businessweek, Trump u pyet nëse do të ofronte mbështetje për Tajvanin në rast tensionesh me Kinën. Ai e krahasoi angazhimin e SHBA-së me një kompani sigurimesh, duke theksuar se Tajvani “nuk na jep asgjë” për mbrojtjen.
Pavarësisht se SHBA nuk e njeh zyrtarisht Tajvanin, ajo mbetet partneri kryesor në sigurimin e armëve, me shitjet që janë rritur ndjeshëm gjatë presidencës së Trump. Partia Komuniste kineze vazhdon të pretendojë për Tajvanin si një provincë dhe nuk përjashton përdorimin e forcës për ta aneksuar.