Prokuroria e Posaçme (SPAK) ka vendosur të shtyjë me tre muaj hetimet për ish-zëvendëskryeministrin Arben Ahmetaj. Afati i ri për përfundimin e dosjes “Ahmetaj” është caktuar për datën 22 dhjetor 2024, pas së cilës pritet që çështja të kalojë në Gjykatën e Posaçme për gjykim.
Ahmetaj, i cili ka qenë ministër i Financave, akuzohet për kryerjen e veprave penale “Pastrim parash”, “Fshehje të pasurisë” dhe “Korrupsion pasiv”. Në korrik të vitit të kaluar, SPAK lëshoi një urdhër arresti për të dhe e shpalli në kërkim ndërkombëtar, ndërsa në mars 2024 i komunikoi akuzat përmes avokatit të tij.
Ai dyshohet se ka marrë disa akte për të lehtësuar lidhjen e kontratave koncensionare për sipërmarrësit gjatë mandatit të tij.
