Presidenti i Partisë së Lirisë Ilir Meta me anë të një postimi ka uruar studentët për vitin e ri akademik, veçanërisht për ata që ulen për herë të parë në auditore.
Meta shprehet se “Universitetet duhet të jenë djepi i mendimit shkencor, i mendimit kritik profesional dhe i zhvillimit të gjithanshëm, por vit pas viti Qeveria e ka goditur fort arsimin universitar duke tkurrur auditoret me axhendën e qëllimshme të shpopullimit, duke dëmtuar rëndë kërkimin shkencor me mosbuxhetimin e duhur dhe duke braktisur profesorët, që ende nuk kanë paga dinjitoze”.
Ai thotë që viti i ri akademik ka filluar me protesta sepse është koha që zëri i studentëve dhe pedagogëve të dëgjohet fort.
Meta thekson se arsimi duhet kthyer në përparësi kombëtare dhe Partia e Lirisë e ka prioritet kryesor për të ndaluar fenomenin e shpopullimit.
