Ish-kryebashkiaku i Kukësit, Safet Gjici, ka kërkuar që të vuajë pjesën e mbetur të dënimit në shtëpi, për shkak të problemeve të rënda shëndetësore.
Gjatë seancës gjyqësore të zhvilluar në Gjykatën e Shkallës së Parë të Elbasanit, ai kërkoi lehtësira për të kaluar pjesën e mbetur të dënimit për shkak të gjendjes së tij, duke u bazuar në argumentet e avokatit të tij, i cili theksoi se Gjici vuan nga probleme kardiovaskulare dhe diabeti i formës së rënduar.
Gjykata ka vendosur thirrjen e ekspertëve mjeko-ligjorë për të verifikuar gjendjen shëndetësore të ish-kryebashkiakut. Seanca e radhës do të mbahet më 14 nëntor në orën 11:45, ku ekspertët do të paraqesin raportin e tyre.
Gjici, i dënuar me 3 vite burg për korrupsion dhe shpërdorim detyre, ka ende 1 vit e 2 muaj të mbetur për të vuajtur, ndërkohë që aktualisht është i shtruar në spital.
