Ambasada e Shqipërisë në Kiev ka pësuar dëme të konsiderueshme nga bombardimet e ushtrisë ruse, që goditën kryeqytetin ukrainas mëngjesin e së premtes. Fatmirësisht, nuk ka pasur të lënduar, por vetëm dëme materiale. Kremlini ka shënjestruar një objekt rezidencial në afërsi të ambasadës, duke shkaktuar dëme në tavanin e godinës dhe thyerje të xhamave të dritareve.
Ministria për Evropën dhe Punët e Jashtme e Shqipërisë ka reaguar menjëherë, duke dënuar ashpër sulmet, të cilat i cilësoi si “brutale” dhe një shkelje të rëndë të parimeve të diplomacisë ndërkombëtare. Në një deklaratë të saj, ministria theksoi se “mbrojtja e personelit diplomatik dhe paprekshmëria e misioneve janë parime të panegociueshme” që duhet të respektohen dhe zbatohet nga të gjithë aktorët ndërkombëtarë. Sulmi rrezikoi jetën e stafit diplomatik shqiptar, duke theksuar nevojën për mbrojtjen e misioneve diplomatike në zonat e konfliktit.
