Volodymyr Zelensky tha se nëse Evropa është “serioze” për sigurimin e një parandalimi efektiv, do të nevojiten një minimum prej 200,000 trupash. Kievi ka folur për nevojën për 50,000 trupa për të vepruar si një forcë sigurie përgjatë vijës së frontit prej 1,000 kilometrash. Një numër që ata thonë se është “i realizueshëm”, por në mënyrë ideale ata do të donin 200,000 njerëz të armatosur, siç tha presidenti ukrainas nga Davos.
Shifra prej 50,000 u diskutua midis Kievit dhe partnerëve të tij perëndimorë, sipas Financial Times. Këto raportime shkaktuan një reagim të fortë nga Moska, e cila paralajmëroi një përshkallëzim të pakontrolluar të konfliktit në rast të pranisë së një ushtrie kaq të madhe nga Evropa.
Evropa po “merr pjesë” në luftë duke ofruar ndihmë për Ukrainën, pa një dislokim masiv të forcave tokësore perëndimore, ndryshe nga Rusia që ka përdorur trupat e Koresë së Veriut. “Kjo mund të ndryshojë,” shkruan Financial Times.
Kthimi i Donald Trump në Shtëpinë e Bardhë ka ringjallur interesin për idenë, e cila u shfaq për herë të parë një vit më parë nga Emmanuel Macron i Francës. Në atë kohë, ajo u përjashtua si jopraktike dhe shumë e rrezikshme. Por që atëherë, ushtria e Ukrainës ka pasur vështirësi.
Perspektiva e anëtarësimit në NATO është zvogëluar dhe Trump, duke kërkuar të distancohet nga çështjet e sigurisë evropiane, ka thënë se dëshiron një armëpushim “sa më shpejt të jetë e mundur”. Dhe Kievi ka sinjalizuar se është gati për një marrëveshje për sa kohë që aleatët e tij ofrojnë garanci të forta sigurie.
Megjithatë, a është reale shifra që kërkon Zelensky? “Jo, aspak”, shkruan FT. “Po flasim për shumë më tepër forca sesa numri i trupave që morën pjesë në zbarkimet e Normandisë në Luftën e Dytë Botërore.
Britania, Franca dhe Holanda mund të udhëheqin formimin e një kontigjenti ushtarak, bien dakord shtetet baltike, ndërsa Gjermania dhe Polonia kundërshtojnë dërgimin e trupave të tyre. Friedrich Merz, lideri i Kristian Demokratëve të Gjermanisë, i cili ka të ngjarë të bëhet kancelar pas zgjedhjeve të 23 shkurtit, ka shprehur mbështetjen e tij për Ukrainën, por nuk e ka mbështetur në mënyrë eksplicite idenë e vendosjes së trupave”.
