Kryetarja e Kuvendit Elisa Spiropali ka vijuar sot takimet në kuadër të programit “Kuvendojmë për Shqipërinë” në qarkun e Elbasanit. Spiropali në ambientet e Teatrit Skampa ka prezantuar nismën “Kuvend-ON”, një program ku çdo qytetar mund të shprehë shqetësimet e tyre drejtpërdrejt me kryetaren e Kuvendit.
Spiropali ka shprehur se debati publik i shërben demokracisë dhe në Kuvendin e Shqipërisë përcillen vazhdimisht problematikat e qytetarëve, në veçanti gjatë Javës së Gjelbër kur deputetët gjenden në zonat e tyre zgjedhore.
“Kuvendi ka një rol shumë të rëndësishëm në procesin e anëtarësimit në Bashkimin Europian.
Të gjitha strukturat parlamentare, Shërbimi për Integrimin Evropian, Komisioni për Çështjet Evropiane, komisionet e posaçme janë angazhuar maksimalisht për realizimin e prioritetit numër një të Kuvendit.
Por përmbushja e këtij objektivi kërkon angazhimin e fortë të të gjithëve për integrimin në Bashkimin Evropian.
Kuvendi ka rol madhor për këtë çështje dhe të gjithë duhet të jemi bashkë”, ka thënë kryetarja e Kuvendit.
