Kryeministri Edi Rama sot ishte në Durrës ku zhvilloi një takim qytetarët duke prezantuar kandidatët për zgjedhjet e 11 Majit. U foli durrsakëve për ëndrra, integrimin në BE, që ka dekada që premtohet dhe që ende është larg. Megjithatë, Rama ka vendosur vitin 2030 si afat duke lënë të kuptohet qartë se jo vetëm mandatin e katërt, por do edhe të pestin.
“Thjeshtë do të jetë çështja sa i thellë do të jetë rezultati dhe jo kush fitoi. Zgjedhjet e 11 majit kanë një komponent ndryshe nga të tjerat. Ato kanë një komponent gjeopolitik që, besoj unë, zgjedhjet e kanë pasur vetëm në fillimet e transformimit demokratik pas rënies së komunizmit në 1991 kur shqiptarët morën një vendim për të vulosur përfundimisht ndarjen me një kohë dhe sistem tjetër duke përqafuar një sistem të ri vlerash”, tha Rama.
