Policia e Dibrës ka nisur hetimin pas një videoje që qarkullon në rrjetet sociale, ku shfaqet një automjet policie duke kryer një parakalim të rrezikshëm brenda një tuneli në Rrugën e Arbrit.
Pas verifikimit të kamerave, është identifikuar drejtuesi i automjetit, Inspektori D.D. nga Komisariati i Policisë Bulqizë. Për shkeljen, Policia Rrugore ka vendosur një gjobë prej 40,000 lekë dhe ka zbritur 15 pikë nga leja e drejtimit të Inspektorit.
Gjithashtu, Drejtoria e Standardeve Profesionale ka nisur një hetim disiplinor ndaj Inspektorit D.D. dhe Shefit të Komisariatit të Bulqizës, Kryekomisarit E.P., për shkelje të rënda të rregullave dhe për rrezikimin e jetës së qytetarëve.
Policia ka ftuar qytetarët të denoncojnë çdo rast të abuzimit me detyrën nga punonjësit e saj dhe ka garantuar reagim të shpejtë dhe profesional.
