Shtetet e Bashkuara “nuk do ta fitojnë Grenlandën”, e cila do të vendosë vetë të ardhmen e saj, i është përgjigjur të dielën presidentit amerikan Donald Trump kryeministri i ri i territorit autonom të Danimarkës, Jens-Frederik Nielsen.
“Presidenti Trump thotë se SHBA do ta marrin Grenlandën. Ne jemi të qartë: SHBA nuk do të fitojë Grenlandën. Ne nuk i përkasim askujt tjetër. Ne vendosim të ardhmen tonë” tha Nielsen në një postim në Facebook.
Në një intervistë me NBC News të dielën, Trump përsëriti se SHBA “do të marrin Grenlandën, 100%.
Kryeministrja daneze Mette Frederiksen do të bëjë një vizitë tre-ditore në Grenlandë këtë javë për të “forcuar unitetin” me ishullin Arktik.
Partitë kryesore të Grenlandës duan që ishulli të jetë i pavarur, por ata nuk pajtohen se si ta bëjnë këtë. Presioni amerikan i bindi ata të bashkonin forcat, duke formuar një qeveri koalicioni katërpartiak.
