Kryeministri Edi Rama në takimin me shqiptarët e Athinës, deklaroi se “pagën mesatare 1000 euro në sektorin publik e shikojmë me optimizëm në mandatin e katërt”. U foli për investimet, arritjet, pensionet, etj. Tregoi një rrugë tjetër për marrjen e pensioneve.
“Marrëveshja me pensionet, kjo është ajo që duhet. Me qeverinë greke i kemi marrëdhëniet shumë të mira sot. Duke votuar nr. 5, ne njohjen tuaj të pensioneve të mos e marrim përmes marrëveshjes me qeverinë greke por përmes anëtarësisë në BE, sepse në momentin që bëhemi anëtare të BE-së, pasaporta kuqezi që ju do të keni të gjithë në dorë do të jetë njëlloj me pasaportën greke që nuk do ju duhet më fare”.
Kryeministri Edi Rama e quan çdo ditë ‘buf kënete’, por ky epitet për Sali Berishën nuk është aspak ofendim, përkundrazi. Berisha kujtoi se bufi ka qenë simbol i Perëndeshës së luftës dhe mençurisë, Athinasë. Por Rama sot nga Athina, tha se nuk bëhet fjalë për të njëjtin buf.
“Kishte dalë një ditë dhe thoshte unë jam krenar dhe e kam për nderë të jem buf sepse bufi ka qenë simboli i Athinasë dhe Minervës dhe simboli i urtësisë dhe bukurisë, se i duket vetja edhe i bukur atij dhe ju e dini vetë sa super seksi është (Berisha). Por problemi është nuk bëhet fjalë për të njëjtin buf.
Bufi i grekëve dhe romakëve ishte ai që quhej bufi i vogël, ndërsa ky është bufi që populli ynë thotë ‘cmë rri aty o buf kënete”. Ai bufi ynë rri dhe mbretëron në një llum që e ka penguar Shqipërinë për kaq shumë vite. Dhe atë bufin në Tiranë nuk e kemi trashëgimi nga qytetërimi ynë i vjetër por peshqesh nga diktatura komuniste” tha ai.
