Policia e Fierit ka arrestuar 40-vjeçarin Astrit Hasani pasi ka kanosur duke sharë, ofenduar dhe kërcënuar punonjësin e policisë të Forcës Kombëtare të Sigurisë, njësia Fier, i cili ishte në shërbim, në mbikëqyrje të tij.
40-vjeçari ishte me masë sigurie “Arrest në shtëpi”, me mbikëqyrje policore 24 orë, për veprat penale “Trafikimi i armëve dhe municionit luftarak”, “Largimi i të burgosurit nga vendi i qëndrimit”, “Rrëmbimi ose mbajtja peng e personit”, të kryera në bashkëpunim dhe “Vrasja e punonjësve të Policisë së Shtetit”, e mbetur në tentativë.
Astrit Hasani ose Alesio Xhelo i njohur ndryshe si “Titi” është një person i shumëkërkuar në Greqi. Ai ishte arratisur nga burgu grek në qershor 2019 duke marrë peng një police dhe i kapur në Vlorë me armë pa leje në muajin tetor 2019.
“Titi” ka qenë i dënuar me burgim të përjetshëm për vrasjen e një greku dhe i përfshirë në 8 shkëmbime zjarri me policinë në Greqi. Gjithashtu edhe në dhunimin e gruas se një diplomati të huaj gjatë grabitjes së shtëpisë së tyre dhe në rrëmbimin e një të riu që e liroi pasi mori shumë para nga familja e tij.
