Kancelari gjerman, Friedrich Merz, njoftoi se vendet anëtare të Bashkimit Evropian po diskutojnë mënyra për të ushtruar presion ndaj Izraelit, me qëllim arritjen e një armëpushimi në Rripin e Gazës. Ai u shpreh pas takimeve në Bruksel me liderët evropianë, duke theksuar shqetësimin e Bashkimit Evropian për situatën humanitare atje.
“Ne kemi diskutuar në detaje mundësitë e bashkëpunimit me Shtetet e Bashkuara për të ndikuar tek Izraeli në drejtim të një armëpushimi. Këshilli Evropian ka shprehur një qëndrim të qartë në këtë çështje,” tha Merz.
Sipas tij, të gjitha vendet anëtare kanë rënë dakord për këtë qëndrim dhe po bashkëpunojnë në mënyrë unanime për të ndihmuar në zgjidhjen e krizës. Në përfundimet e Samitit të BE-së u kërkua gjithashtu armëpushim i menjëhershëm dhe lirimi pa kushte i të gjithë pengjeve.
Udhëheqësit evropianë i kanë bërë thirrje Izraelit që të zbatojë plotësisht detyrimet e tij sipas ligjit ndërkombëtar, duke mbrojtur civilët, punonjësit humanitarë dhe infrastrukturën civile si spitalet dhe shkollat.
Megjithatë, përkundër propozimeve nga disa vende si Spanja dhe Irlanda për të pezulluar marrëveshjen tregtare me Izraelin për shkak të shkeljeve të të drejtave të njeriut në territoret e pushtuara, nuk arritën të sigurojnë mbështetje unanime nga udhëheqësit e tjerë.
Që nga fillimi i fushatës ushtarake të Izraelit në Gaza në vitin 2023, mbi 56 mijë palestinezë kanë humbur jetën, dhe më shumë se 100 mijë janë plagosur, kryesisht gra dhe fëmijë. Ndërkohë, Izraeli po përballet me një padi për gjenocid në Gjykatën Ndërkombëtare të Drejtësisë, ndërsa afërsisht 1.9 milion palestinezë vazhdojnë të jenë të zhvendosur dhe përballen me mungesa të thella ushqimore dhe shëndetësore.
