Një ngjarje tragjike ka ndodhur mesditën e sotme në fshatin Balldren të Lezhës, ku çifti Kreshnik dhe Gentjana Mujeci, 39 dhe 32 vjeç, përkatësisht, mbetën të vdekur pas një atentati me armë zjarri.
Rreth orës 14:50, automjeti i tyre tip Audi Q7 u qëllua me mbi 30 plumba, duke i lënë të vdekur në vendngjarje.
Policia ka nisur hetimet dhe për këtë qëllim janë dërguar specialistët e sektorit të Krimeve të Rënda nga Tirana.
Pavarësisht se atentati ka ndodhur në një zonë të banuar, autorët ende nuk janë identifikuar. Ata ishin duke u kthyer në banesën e tyre, pas një ndalese në një lokal në autostradën Lezhë-Shkodër.
Viktima, Kreshnik Mujeci, kishte qenë i arrestuar më parë në vitin 2017 si i dyshuar për vrasjen e Genci Mhillaj në Shkodër.
Në atë kohë, ai ishte akuzuar për vrasje me paramendim dhe për kryerjen e veprës penale “Vrasje me paramendim”, në bashkëpunim.
Kreu i komanduar i Policisë së Lezhës, Arben Nasufi, ka konfirmuar se mjeti i viktimave u godit me breshëri plumbash ndërsa ishte në lëvizje, ndërsa hetimet janë në vazhdim për zbardhjen e ngjarjes dhe identifikimin e autorëve.
