Ministri Blendi Gonxhja njoftoi përmbylljen me sukses të raundit të dytë të negociatave mes Shqipërisë dhe Letonisë për marrëveshjen në fushën e sigurimeve shoqërore.
Delegacioni shqiptar u udhëhoq nga zëvendësministrja Olta Manjani, ndërsa pala letoneze nga drejtoresha Ineta Tāre.
Palët ranë dakord për marrëveshjen kuadër dhe atë administrative, që sigurojnë mbrojtjen e të drejtave të qytetarëve që punojnë në të dy vendet.
Gonxhja vlerësoi këtë arritje si një hap të rëndësishëm drejt integrimit evropian, duke theksuar se Shqipëria ka arritur 21 marrëveshje bilaterale në fushën e sigurimeve shoqërore, prej të cilave 13 me vende të BE-së.
Marrëveshja pritet të miratohet nga qeveritë dhe parlamentet përkatëse dhe do të garantojë mbrojtjen e të drejtave të qytetarëve shqiptarë dhe letonezë, pavarësisht lëvizjes ndërmjet vendeve.
