Policia e Gjirokastrës ka arrestuar katër persona pasi transportonin 9 emigrantë me qëllim kalimin e paligjshëm të kufirit.
17-vjeçari u arrestua në aksin rrugor “Gjirokastër-Tepelenë”, në vendin e quajtur “Ura e Kardhiqit”, duke drejtuar automjetin tip “Mercedez benz”, pa leje drejtimi. Ai po transportonte kundrejt fitimit, 9 emigrantë nga Egjipti, në drejtim të Shkodrës, me qëllim kalimin e paligjshëm të kufirit. 17-vjeçari nuk iu bind urdhrit të punonjësit të policisë për kontroll, por braktisi automjetin dhe u largua.
Ndërsa Klajdi Bilbili 29 vjeç, Altin Alla 48 vjeç dyshohet se qarkullonin me automjetin tip “Fiat”, për të kontrolluar rrugën dhe për të sinjalizuar 17-vjeçarin, për prezencë të shërbimeve të Policisë. Ndërsa Danjel Dita 34 vjeç dyshohet se kishte rolin e organizatorit në këtë veprimtari kriminale.Në cilësinë e provës materiale u sekuestruan 2 automjetet, 400 euro dhe 6 celularë.
Ndërsa materialet procedurale kaluan Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme.
