Policia Kufitare e Korçës ka goditur dy raste të paligjshmërive në pikë-kalimet kufitare Qafë Thanë dhe Goricë.
30-vjeçari me iniciale V.T., banues në Maqedoninë e veriut gjatë kontrollit në makinën e tij, policia i gjeti të fshehur nën rimorkio 1 maroken. 30-vjeçari u procedua penalisht për veprën penale “Ndihma për kalim të paligjshëm të kufijve”.
Ndërsa në pikën kufitare Goricë, gjatë kontrollit në makinën e A.T., 63 vjeç, banues në fshatin Zaroshkë, u gjetën produkte ushqimore dhe medikamente, të papajisura me fatura blerjeje. 63-vjeçari u procedua për veprat penale “Kontrabanda me mallra të tjera” dhe “Tregtimi dhe transportimi i mallrave që janë kontrabandë”.
Në cilësinë e provës materiale u sekuestruan mallrat. Ndërsa materialet procedurale iu referuan Prokurorisë së Korçës, për veprime të mëtejshme.
