Pavarësisht pezullimit nga garat ndërkombëtare pas pushtimit të Ukrainës, klubet ruse të futbollit kanë përfituar mbi 10.8 milionë euro nga fondet e solidaritetit të UEFA-s për sezonet 2022-2025, sipas The Guardian.
Ndërkohë, pesë klube ukrainase nuk kanë marrë asnjë pagesë, me arsyetimin se ndodhen në “zona lufte”.
Ata e kanë denoncuar situatën në një letër drejtuar presidentit të UEFA-s, Aleksander Ceferin, duke e quajtur vendimin të padrejtë dhe të pakuptueshëm.
UEFA ende nuk ka reaguar zyrtarisht, ndërsa kritikat për qëndrimin e saj ndaj Rusisë po shtohen.
Ndër shqetësimet e ngritura është edhe fakti se Rusia vijon të marrë pikë në renditje, pavarësisht pezullimit të klubeve të saj.
