Maqedonia e Veriut po shkon drejt zgjedhjeve lokale të Tetorit. Aleanca për Shqiptarët, krahu i Arben Taravarit ka kërkuar një pakt të ri politik mes shqiptarëve dhe maqedonasve të ndërtuar mbi barazi reale dhe përfaqësimi të drejtë e adekuat në të gjitha nivelet e shtetit.
“Kjo do të thotë se institucionet shtetërore – nga administrata deri te policia dhe gjyqësori – duhet të pasqyrojnë përbërjen multietnike të vendit, duke garantuar që shqiptarët të mos mbeten të nën-përfaqësuar. Një shtet demokratik nuk mund të funksionojë mbi bazën e margjinalizimit.
Prandaj, platforma e Aleancës synon ruajtjen dhe fuqizimin e identitetit, gjuhës, kulturës dhe trashëgimisë shqiptare, duke siguruar që komuniteti shqiptar të mos mbetet i përjashtuar nga zhvillimet politike, ekonomike dhe shoqërore”.
Boshti kryesor i kësaj marrëveshjeje të re politike, sipas ASH-së, është krijimi i kushteve që shqiptarët të trajtohen si qytetarë të barabartë, e jo si qytetarë të dorës së dytë.
