Kombëtarja ka mbyllur përgatitjet në qendrën stërvitore në Malaga për miqësoren me Gjibraltarin, që do të luhet sonte, më 4 shtator, ora 18:00 në stadiumin “Europa Point” të Gjibraltarit.
Deri tani i gjithë grupi gëzon formë të mirë dhe nuk ka probleme me dëmtimet, sipas FSHF. Pas miqësores me Gjibraltarin, më datë 9 shtator kombëtarja do të presë Letoninë në sfidën e kualifikueseve që do të zhvillohet në stadiumin “Air Albania” dhe nis në ora 20:45.
Biletat për sfidën zyrtare të kuqezinjve në kualifikueset e Botërorit 2026 mund t’i blini online në adresën ebileta.al si edhe në biletarinë fizike që ndodhet në hyrjen qendrore të stadiumit “Air Albania” në Tiranë (e hapur çdo ditë nga ora 10:00 deri në orën 18:00).
