Një ngjarje e rëndë që tronditi kampingun në Finikounda të Greqisë më 5 tetor, ku humbën jetën pronari 68-vjeçar dhe kujdestari i tij shqiptar, po merr dritë të re përmes dëshmisë së nipit të viktimës dhe dëshmitarëve të tjerë të ngjarjes.
Nipi i pronarit, i cili ishte edhe dëshmitar okular i krimit, ka dhënë një rrëfim të detajuar për atë që ndodhi brenda kampingut atë natë, duke ndihmuar hetuesit të kuptojnë më mirë dinamikën e ngjarjes.
Ai tregoi se pas sulmit të rëndë, telefoni i tij ishte në vendin e ngjarjes dhe ai nuk ishte në gjendje të fliste vetë, ndaj kërkoi ndihmë nga ish-punëdhënësi i njërit prej të dyshuarve, një person i njohur për të. Në dëshminë e tij, nipi sqaroi se në momentin e krimit ishte në zonën e pritjes së kampingut, ku kishte parë një burrë me këmishë të bardhë me mëngë të shkurtra dhe një çantë të zezë, që po afrohej drejt tij dhe xhaxhait të tij.
Ai kujtoi momentin kur xhaxhai e përshkroi me ironi dhe si menjëherë pas kësaj dëgjoi krismat e armës që shënuan fillimin e tragjedisë. Më pas, nipi u përpoq të ikte dhe paralajmëroi kujdestarin për rrezikun, por ai nuk arriti t’i shpëtonte të shtënave dhe ra i vrarë në vend.
Në rrëfimin e tij, nipi theksoi se ishte i bindur që mund ta njihte vrasësin, i cili dukej i huaj dhe fliste një anglishte me theks. Ai përshkroi gjithashtu momentet e frikshme të arratisjes së tij nga vendi i ngjarjes, duke shpëtuar për mrekulli.
Kjo dëshmi është bërë një element kyç për hetimet, ndërsa autoritetet vijojnë punën për të zbardhur plotësisht rrethanat e këtij krimi të rëndë që tronditi komunitetin lokal dhe jo vetëm.
