Në një zhvillim të fundit lidhur me buxhetin afatgjatë të Bashkimit Evropian, presidentja e Komisionit Evropian, Ursula von der Leyen, ka shprehur gatishmërinë për të bërë ndryshime të mundshme në propozimin e paraqitur për periudhën 2028–2034, pas reagimeve të ashpra nga Parlamenti Evropian.
Ky hap vjen pas kritikave të shprehura nga disa grupe politike të Parlamentit, të cilët e kanë kundërshtuar propozimin aktual për disa arsye, duke përfshirë dhe mënyrën e shpërndarjes së fondeve të BE-së.
Në një letër të dërguar presidentes së Parlamentit Evropian, Roberta Metsola, dhe presidencës aktuale të Këshillit të BE-së, Ursula von der Leyen ka theksuar opsionet për ndryshime në propozimin e buxhetit, duke përfshirë “dhënien e një roli më të madh rajoneve, ofrimin e garancive për sektorin bujqësor dhe forcimin e rolit të Parlamentit Evropian në shpërndarjen e fondeve nga buxheti i BE-së”.
