Kryeministri Edi Rama ka reaguar pas pezullimit nga detyra të ministres së Infrastrukturës dhe Energjisë, Belinda Balluku, e pandehur nga SPAK për afera korruptive.
Në një podkast, Rama u shpreh se sipas standardeve europiane, përfshirë Komisionin e Venecias dhe Gjykatën Evropiane të Strasburgut, një ministër nuk mund të pezullohet nga gjykatat ose prokurorët.
Rama theksoi se ministri mund të largohet vetëm: me dorëheqje, nga kryeministri, ose nëse ka një dënim të formës së prerë, duke e konsideruar çdo tjetër masë jokushtetuese dhe antidemokratike.
Ai paralajmëroi se pezullimi gjyqësor i një ministri cenon balancën e pushteteve, ndërhyn në funksionimin e qeverisë dhe krijon precedent të rrezikshëm në standardet demokratike.
“Një ministër ose rri në detyrë, ose largohet me dorëheqje, nga Kryeministri, apo me dënim të formës së prerë. Gjyqësori nuk hyjnë fare në këtë mes dhe nuk e bëjnë kurrësesi këtë. Askund në Europë.”
