Kreu i Partisë Demokratike, Sali Berisha, gjatë fjalës së tij në Kuvend theksoi se integrimi i Shqipërisë në Bashkimin Europian duhet të bazohet në meritë dhe performancë, jo në propagandë dhe fshehje të të vërtetave.
Ai kritikoi qeverinë për keqmenaxhim, korrupsion dhe për mënyrën se si po trajton procesin e integrimit, duke përmendur edhe raportet ndërkombëtare që sipas tij kanë evidentuar probleme në zgjedhje dhe në funksionimin e institucioneve.
“Procesi i integrimit të Shqipërisë në BE, për PD-në është dhe mbetet ylli polar i programit të saj. Është objektivi më madhor, pasi ne e shohim integrimin si të ardhmen më të mirë për qytetarët shqiptarë. Por ne e marrim këtë proces si një proces të bazuar në meritë dhe performancë. Kurse qeveria e merr këtë proces të bazuar në mashtrime, manipulime, censurë dhe fshehje të të vërtetave. Tre misione faktmbledhëse nga Brukseli vërtetuan gjëra të pabesueshme për situatën në Shqipëri dhe raportuan probleme serioze në zgjedhje dhe në funksionimin e institucioneve. Edi Rama dhe Lubi Balluku janë bërë famëzinj në Bruksel dhe në çdo kancelari europiane për mënyrën se si kanë menaxhuar këto çështje”.
