Në një moment kritik për marrëdhëniet SHBA-Venezuela, presidenti turk Rexhep Tajip Erdogan ka zhvilluar një bisedë telefonike me presidentin venezuelian Nikolas Maduro, duke theksuar rëndësinë e mbajtjes së kanaleve të komunikimit të hapura dhe uljen e tensioneve.
Gjatë bisedës, Erdogan shprehu shqetësimin për kërcënimet ndaj Venezuelës, duke përfshirë dislokimet ushtarake që mund të rrezikojnë paqen dhe sigurinë në Karaibe, ndërsa Maduro theksoi natyrën “paligjore dhe të panevojshme” të këtyre kërcënimeve.
Dy liderët, të cilët kanë marrëdhënie të ngushta politike dhe ekonomike, diskutuan gjithashtu mundësitë për forcimin e bashkëpunimit mes Turqisë dhe Venezuelës.
Erdogan, i cili ka mbështetur vazhdimisht Maduro në nivelet ndërkombëtare, e vizitoi Karakas-in në vitin 2018 dhe ka ofruar mbështetje për rizgjedhjen e presidentit venezuelian, pavarësisht kritikave të perëndimit për proceset zgjedhore.
