Ministri i Drejtësisë, Besfort Lamallari, deklaroi se në muajt e ardhshëm do të prezantohet një platformë e re për zgjidhjen e mosmarrëveshjeve përmes metodave alternative, duke shmangur procedurat e gjata dhe të kushtueshme gjyqësore.
Lamallari theksoi se kjo platformë synon të kontribuojë në uljen e ngarkesës në gjykata dhe të ofrojë mundësi për qytetarët që të zgjidhin çështjet e tyre në mënyrë më të shpejtë dhe efikase, pa pasur nevojë të shkojnë detyrimisht në gjykatë.
Në një intervistë për Radio Televizionin Shqiptar, Lamallari përmendi si shembull mundësinë e zgjidhjes së divorcit pa pasur implikime financiare, përmes noterit, siç bëhet në shumë vende europiane.
Ai theksoi gjithashtu rëndësinë e përdorimit të formave alternative të zgjidhjes së mosmarrëveshjeve, si ndërmjetësimi, arbitrazhi dhe pajtimi, që mund të sugjerohen nga gjykatat dhe të ofrohen si mundësi për qytetarët.
Ministri foli gjithashtu për përdorimin e teknologjisë dhe Inteligjencës Artificiale në zgjidhjen e konflikteve dhe shmangien e nevojës për të shkuar fizikisht në gjykata. Ai theksoi se ky është një hap i rëndësishëm drejt përmirësimit të shërbimeve ligjore dhe efikasitetit të sistemit të drejtësisë.
“Do të prezantojmë një platformë që do të përdorë mekanizma të ndryshëm ligjorë dhe teknologjikë, për të mundësuar zgjidhjen e çështjeve pa shkuar në gjykatë. Kjo është një mundësi për të përmirësuar llogaridhënien e institucioneve dhe për të ofruar një shërbim më të shpejtë dhe më efikas për qytetarët,” tha Lamallari.
