Deputeti i Partisë së Lirisë, Tedi Blushi, denoncoi sot gjatë një konference për mediat shkelje të rënda ndaj ish-presidentit Ilir Meta, i paraburgosur prej 21 tetorit 2024 me urdhër të SPAK.
“S’është marrë asnjë masë. I jam drejtuar Ministrit të Drejtësisë dhe Drejtorit të Përgjithshëm të Burgjeve, por nuk ka pasur asnjë përgjigje. Asnjë rekomandim i Avokatit të Popullit nuk është zbatuar”, tha Blushi.
Ai shtoi se komunikimi me Metën është i pamundur, pasi SPAK nuk lejon takime as me deputetë dhe eurodeputetë, ndërkohë që ligji dhe konventat ndërkombëtare garantojnë këtë të drejtë.
“Më nuk kontaktoj dot me zotin Meta. As deputetët, as eurodeputetët nuk mund të takohen me të. Edhe tek ajrosja janë vendosur kufizime; të gjithë të paraburgosurit e bëjnë çdo ditë, kurse zoti Meta është i vetmi që nuk e bën”, u shpreh Blushi.
Kreu i Partisë së Lirisë vijon të mbahet në kushte të rënda izolimi, ndërkohë që mbrojtësit e tij kërkojnë zbatim të të drejtave të garantuara nga ligji dhe konventat ndërkombëtare.
