Kryeministri Edi Rama, gjatë mbledhjes së sotme të Grupit të Parlametar të PS, foli sërish për çështjen e Belinda Ballukut, duke u shprehur se ajo i ka kërkuar tre herë dorëheqjen edhe pse ai e ka refuzuar kategorikisht këtë vendim të ministres. Sipas tij kjo lloj lojë e drejtësisë nuk qëndron në Gjermani apo shtete të tjera europiane, ndaj është kundër këtyre valleve të dorëheqjes automatike.
Fjala e Ramës
Nuk do t’i shmangem sot këtu temës që lidhet me Belinda Ballukun, por nuk do të merrem me procesin që ka nisur në Parlament, se do pres raportin e Këshillit të Mandative para se të them edhe unë fjalën time shteruese për temën e imunitetit. Por dua të ndaj me ju këtu diçka që e kam thënë edhe pa praninë e publikut përmes mediave. Belinda Balluku mua ma ka dorëzuar dorëheqjen tre herë, qysh në mbrëmjen e ditës që iu ngrit akuza. Jo për korrupsion, se është shumë interesant që ndërkohë që të gjitha tenxheret bëjnë llogaritë duke marrë shumat e shpenzuara për të ndërtuar ato vepra, akuza nuk është për korrupsion; nuk ka akuzë për korrupsion, por për pabarazi në tendera. Pastaj ma ka sjellë përsëri dorëheqjen kur u bë pezullimi, pastaj edhe njëherë të tretë kur u ripezullua nga mosvendimi i Gjykatës Kushtetuese. Siç iu kam thënë, e kam hedhur unë poshtë kategorikisht idenë e dorëheqjes.
