Ministria për Evropën dhe Punët e Jashtme ka njoftuar se situata e sigurisë në rajonin e Lindjes së Mesme është përkeqësuar, duke e bërë të paparashikueshme dhe të rrezikshme për qytetarët shqiptarë.
Për shkak të përshkallëzimit të konflikteve ushtarake, autoritetet kanë këshilluar shmangien e udhëtimeve në këtë rajon, duke iu bërë thirrje qytetarëve që ndodhen aty të tregojnë kujdes maksimal.
Ndërkohë, shtetasit e Republikës së Shqipërisë të cilët gjenden aktualisht në rajon këshillohen:
- Të tregojnë vigjilencë maksimale dhe të shqyrtojnë me përparësi mundësinë e largimit përmes linjave ajrore, për aq kohë sa ato vijojnë të jenë funksionale.
- Të ndjekin zhvillimet përmes burimeve mediatike të besueshme dhe kanaleve zyrtare të informacionit;
- Të respektojnë dhe ndjekin në çdo kohë udhëzimet e autoriteteve lokale;
- Të mbajnë dokumentet e udhëtimit dhe mjetet e komunikimit gjithmonë të gatshme;
- Në rast nevoje, të kontaktojnë përfaqësitë diplomatike dhe konsullore të Republikës së Shqipërisë në rajon dhe të veprojnë në përputhje me udhëzimet e tyre.
Në rast të përkeqësimit të mëtejshëm të situatës së sigurisë, mbyllja e hapësirës ajrore në një perimetër më të gjerë sesa vendet e prekura deri tani mbetet një mundësi reale, dhe fluturimet mund të anulohen pa paralajmërim. Për çdo çështje që lidhet me fluturimet, qytetarët këshillohen të kontaktojnë drejtpërdrejt kompanitë ajrore përkatëse.
