Pas bisedimeve diplomatike që synojnë uljen e tensionit në rajon, ende nuk është e qartë nëse Presidenti i SHBA-së, Donald Trump, do të nënshkruajë memorandumin paraprak të mirëkuptimit me Iranin.
Zëvendëspresidenti J.D. Vance theksoi se negociatat po vazhdojnë mbi disa aspekte të formulimit të marrëveshjes, ndërsa çështjet kryesore mbi programin bërthamor të Teheranit mbeten të pazgjidhura.
“Mendoj se është e vështirë të thuhet saktësisht se kur ose nëse presidenti do ta nënshkruajë memorandumin e mirëkuptimit. Po diskutojmë për disa nga formulimet dhe ende ka çështje kritike që lidhen me programin bërthamor të Iranit, përfshirë rezervat e uraniumit të pasuruar shumë dhe procesin e pasurimit. Megjithatë, pala iraniane deri tani ka treguar gatishmëri për të marrë pjesë në mënyrë substanciale në negociata, dhe ne shpresojmë se përparimet do të vazhdojnë dhe se presidenti Trump përfundimisht do të jetë në gjendje të miratojë marrëveshjen.”
