Nënkryetari i Partisë Demokratike, Luçiano Boçi, ka reaguar ashpër pas shpërthimit të zjarrit në landfillin e Bushatit, duke e quajtur situatën një katastrofë mjedisore dhe shëndetësore.
Ai e ka akuzuar kryeministrin Edi Rama për mbingarkimin e landfillit me mbetje nga disa qarqe dhe për dështimin e inceneratorëve, duke theksuar se ky vendim është marrë për të mbuluar korrupsionin.
Boçi ka sugjeruar se zjarri mund të jetë i qëllimshëm për të krijuar hapësira të reja për depozitimin e mbetjeve, duke përdorur taktika të ngjashme me ato të aplikuara në Elbasan.
Reagimi i plotë:
Pamjet apokaliptike vijnë nga landfilli i Bushatit në flakë që prej paradites së sotme.
Bushati “parajsa” e fitimit për korrupsionin qeveritar e interesave kriminale, është dëshmuar sot si porta e “ferrit” për qytetarët e zonës.
Dëmi në mjedis e shëndet është i pallogaritshëm.
Bushati s’ka më kapacitet pas viteve përdorim.
Por Rama i shtoi atij trefish ngarkesë me vendimin absurd për të depozituar aty mbetjet, përveç Shkodrës dhe Lezhës dhe të Elbasanit e Fierit.
Kjo sepse inceneratorët që gllabëruan miliona euro në Elbasan e Fier nuk funksionojnë.
Dhe për të mbuluar korrupsionin u mor ky vendim korruptiv.
Korrupsioni për Ramën lahet me korrupsion.
Zjarrvënia aty është e qëllimshme, sepse duhet të hapet hapësirë që të vijnë plehra më shumë pas ezaurimit të kapaciteteve dhe fitimi korruptiv të mos ndalet.
Siç duket nga Elbasani u morën jo vetëm plehrat, por dhe taktika e zjarrvënies e aplikuar disa herë në Elbasan.
Kjo katastrofë mjedisore e shëndetësore,
për shkak të vendimit absurd të Ramës u paralajmërua nga PD dhe ekspertët, por nuk u dëgjua.
Sot zjarrvënësit e fateve të shqiptarëve se kanë për gjë t’i vendosin një zjarr një landfilli për të ndezur akoma më shumë makutërinë e tyre për të fituar sa më shumë para mbi shëndetin e rrezikuar të njerëzve dhe helmimin e mjedisit!
Ky është Rama dhe kjo është mënyra si qeveris ai!!!!
